Di Gabriel Singi
BUNDU TUHAN – Karamaian Krismas id paroki Bundu Tuhan, pinotimpuun maya do piipiro ababayan ii pinosodia di Faado Paroki, Fr Federick Ben Raymond miampai di komiti MPP.
Kopogulu nopo nga ii no kapahabaran adven ii pinapanau solinaid do tolu minggu. Sombulan po do pogulu do karamaian Krismas dilo, pinapaharo i Fr Federick do katekisis kapahabaran adven kumaa tinimungan ngawi ii moi tanud do kapahabaran adven.
Lobi 300 tulun mantad pototongkop Paroki Bundu Tuhan nokotindapaou do kateksis dii. Id borosboroson do katekisis dilo, pinointalang dii Fr Federick o tudu kapahabaran adven om pinolombus disio dii poinralom do nunu kopio rati do kapahabaran adven. Korotian poinralom nopo diti nga okon nopo ko montok dii popolombus do kapahabaran adven nga lolobi po do suang walai ngaawi ii tombuluion do mooi papahabar.
Pinosorou nogi dii faado do tonggungan kapahabaran nopo nga okon nopo ko mooi poporongou do tondig nga mositi do papahabar do Boros Tobitua do Tuhan tu ilo no Boros Tobitua ii tonsi do kapahabaran do pokinongohon do tulun.
Duo-duo faado, i Fr Fedrick om i Fr Ned Columba nga pinopolombus do karaja om tonggungan diolo do mooi ’papaakun’ do ongotutumbayaan ngawi id pusat paroki om id chapelchapel ngawi.
Sunduan mitatabang nga nokoimbulai nogi maya do pitabangan do momorisi do id suang om labus do panambayangan ii binuruan do KKD Pusat Paroki. Okon nopo ko komolohingan nga notindapou nogi do sukod wagu o pitabangan dilo. Suai ko momilangga nokowonsoi nogi yolo do ‘crib’ tumanud do koponontudukan di Fr
Federick.
Karamaian Tadau Krismas nayatan Paroki Bundu Tuhan rinamai do songowian tulun miampai kinotindapahan id Misa Tobitua. Misa di totuong 24 Dis nopo nga pinotimpuun di jam 8.00 totuong. Pinotimpuun o sodop Krismas do kopokitanan om kaparangahan do piipiro tondig Krismas ii pinolombus do tinimungan komulakan, binuruan dii Adrian Soidi.
Misa Krismas kosuabon dii 25 Dis nopo nga pinaharo duo Misa, jam 7.30 om 9.30 kosuabon.
“Nunu o komoyon do rumikot Isio id tatanga dotokou? Nunu o rati do osusu Isio id tatanga dotokou? Nosusu Isio sabaagi do Raha om Tonsi do tulun. Kinosusuon nopo Dau nga haro o piromutan dii poinralom kopio id suang do koposion dotokou. Piromutan dii agayo kopio rati kumaa toiso-iso dati. Boros do Tuhan nopo ti nga olundus kopio sabab ii Boros najadi do tulun. Noidu Dau o kotuongon om toinsanan ii koluyahan dati om tinampasi tokou Dau”, ka do boros id kaajalan di Fr Federick.
Id karamaian Krismas, notindapou nogi dii migran Timorese. Pointalang kaampayatan diolo i d Misa Tobitua tu yolo nga minomuruan do koir id Misa Koduo ontok 25 Dis.
Karamaian Krismas nayatan paroki nopo nga tinaandak id Chapel Rusod Tobitua, Tomis.
Ababayan do suai ontok tadau dilo, miilang do makan, mogisuai-suai kopokitanan pentas om iri nopo it andadon
kopio do tulun ontok tadau dii nga ii ’tiket kinasip’.
